I conventus electronicus!
Carissimi amici
Hodie, die 31ª mensis Martii, I conventum electronicum egimus. Per quadraginta minuta, mediante ingenio Zoom, latine locuti sumus. "Adfuimus" Felicitas, Sergius, Hibernicus, Rudericus atque ego, Radulfus. Utinam alios agere possimus!

NOVUS ANNUS SCHOLARIS PRINCIPIABIT

Albae Columbulae (discipulos dico... et magistros), prope est scholarum initium. Schola semper magistra vitae est. Gaudeamus igitur.
                                                                                          Radulfus

XIII CONVENTUS COETULI LATINI BONAERENSIS

Heri, die Saturni 22ª mensis Februarii AD 2020, cara amica nostra Agnes nos recepit domi, ut XIII Conventum Latinum ageremus. Adfuimus Alexandra, Agnes, Diana, Felicitas, Sergius, Leonardus, Iacobus, Hibernicus atque ego, Radulfus. Per unam horam latine locuti sumus de rebus variis. Inter alia, de novis modis inter nos communicandi (modus Quidest iam prope cotidianam communicationem nobis dedit), de quibusdam politicis opinionibus, de libris quos Diana et Hibernicus asportaverunt... et memoria mihi deficit. Ecce Harrius Potter quem Diana nobis monstravit. 

Omnes laeti eramus manemusque proximum conventum Coetuli nostri. Ecce photographema.

Carisimi amici
Postea quaedam de ultimo Latino Conventu scribam.
Salutat vos
Radulfus

XII CONVENTUS ACTUS EST

Carissimi amici
Heri domi XII Conventus nostri Coetuli Latini Bonaerensis actus est. Dum ptisanam, cafeum aliosque potus bibebamus, latine loqui temptabamus. De variis rebus, certe. Exempli gratia, de hodiernis latinitatis studiis, de meo recenti Italico itinere. Adfuerunt Alexandra, Felicitas, Augustina, Rudericus, Sergius atque ego, Radulfus.
Vivat Latinitas!

Radulfus

                                                                     XI CONVENTUS

            Die 25ª mensis Augusti, AD 2018, Sophia et Fridericus, amici Coetuli nostri, domi nos receperunt,ut nostrum conventum ad latine loquendum ageremus. Sodales tantumodo tres adfuimus: Rudericus, Sergius atque ego, Radulfus (in sequenti conventu plures certe erimus).

            Dum dulcia et ptisanam capiebamus, de diversis rebus locuti sumus. Marisa, Sofía, Alejo et Federico hispanice ἐλάλουν; nos, ut par est, latine.

            Gratias multas, Friderice et Sophia, ob vestram Homericam hospitalitatem!

X CONVENTUS ACTUS EST

Heri, die 5ª mensis Martii AD 2018, domi iuvenes, qui mecum hunc Coetulum Latinum formant, recepi. Quibus de rebus locuti sumus? Exempli gratia, de activa nostra in Quidest (WhatsApp) communicatione; etiam de itinere meo in Lusitaniam et Gallaeciam, ubi multas res Romanas mirati sumus.

In photographemate stantes videtis, amici, Hibernicum et meipsum Radulfum; sedentes autem Sebastianum, Sergium, Augustinam, Alexandram et Dianam. Felices sumus sequentem Conventum manentes. Valete omnes,

Radulfus